Manx Bible :: Psalm 119

	Psalm 119	Psalm 119
Aleph
1	Bannit t'adsyn ta glen ayns y raad: as ta gimmeeaght ayns leigh yn Chiarn.	Blessed are those that are undefiled in the way: and walk in the law of the Lord.
2	Bannit t'adsyn ta freayll ny recortyssyn echey: as shirrey er e hon lesh ooilley nyn gree.	Blessed are they that keep his testimonies: and seek him with their whole heart.
3	Son t'adsyn nagh vel jannoo veg yn olk: gimmeeaght ayns e raaidyn.	For they who do no wickedness: walk in his ways.
4	T'ou uss er harey shin: dy imneagh dy reayll dt'annaghyn.	Thou hast charged: that we shall diligently keep thy commandments.
5	O dy beagh my raaidyn cha jeeragh shen: dy voddin dty lattyssyn y reayll!	O that my ways were made so direct: that I might keep thy statutes!
6	Myr shen cha bee'm er my choyrt gys nearey: choud's ta mee coyrt tastey da ooilley dty annaghyn.	So shall I not be confounded: while I have respect unto all thy commandments.
7	Ver-ym booise dhyt lesh cree firrinagh: tra vee'm er n'ynsaghey briwnyssyn dty chairys.	I will thank thee with an unfeigned heart: when I shall have learned the judgements of thy righteousness.
8	Freill-ym dty oardaghyn: O ny treig mee dy bollagh.	I will keep thy statutes: O forsake me not utterly.
Beth
9	Cre'n aght nee dooinney aeg e raaidyn y reayll glen: dy jarroo liorish reill eh-hene cordail rish dty ghoo?	Wherewithal shall a young man cleanse his way: even by ruling himself after thy word.
10	Lesh ooilley my chree ta mee er hirrey er dty hon: O ny lhig dou goll er-shaghryn veih dty annaghyn.	With my whole heart have I sought thee: O let me not go wrong out of thy commandments.
11	Dty ghoan ta mee er ollaghey cheusthie ayns my chree: nagh jinnin peccah dt'oï.	Thy words have I hid within my heart: that I should not sin against thee.
12	Bannit t'ou uss, O Hiarn: O ynsee dou dty lattyssyn.	Blessed art thou, O Lord: O teach me thy statutes.
13	Lesh my veillyn ta mee er ny ve ginsh jeh ooilley briwnyssyn dty veeal.	With my lips have I been telling: of all the judgements of thy mouth.
14	Ta taitnys wheesh er ve aym ayns raad dty leighyn: as ayns dy chooilley vonney dy verchys.	I have had as great delight in the way of thy testimonies: as in all manner of riches.
15	Nee'm taggloo jeh dt'annaghyn: as ver-ym geill da dty raaidyn.	I will talk of thy commandments: and have respect unto thy ways.
16	Bee my haitnys ayns dty lattyssyn: as cha jarrood-ym dty ghoo.	My delight shall be in thy statutes: and I will not forget thy word.
Gimel
17	O jean mie da dty harvaant: dy voddym 've bio as dty ghoo y reayll.	O do well unto thy servant: that I may live and keep thy word.
18	Foshil uss my hooillyn: dy voddym fakin reddyn yindyssagh dty leigh.	Open thou mine eyes: that I may see the wondrous things of thy law.
19	Ta mee my yoarree er y thalloo: O ny jean uss keiltyn voym dty annaghyn.	I am a stranger upon earth: O hide not thy commandments from me.
20	Ta m'annym brishey magh son y ghraih feer jeean: t'eck dy kinjagh gys dt'oardaghyn.	My soul breaketh out for the very fervent desire: that it hath alway unto thy judgements.
21	T'ou er choyrt oghsan da ny mooaralee: as cursit t'adsyn ooilley ta goll er-shaghryn veih dty annaghyn.	Thou hast rebuked the proud: and cursed are they that do err from thy commandments.
22	O chyndaa voym's nearey as oghsan son ta mee er vreaylley dty recortyssyn.	O turn from me shame and rebuke: for I have kept thy testimonies.
23	Ren princeyn myrgeddin soie as loayrt m'oï: agh ta dty harvaant taaghey eh-hene ayns dty lattyssyn.	Princes also did sit and speak against me: but thy servant is occupied in thy statutes.
24	Son ta ny recortyssyn ayds my voggey: as my ir-choyrlee.	For thy testimonies are my delight: and my counsellors.
Daleth
25	Ta m'annym lhiantyn gys y joan: O jean uss mish y vioghey cordail rish dty ghoo.	My soul cleaveth to the dust: O quicken thou me, according to thy word.
26	Ta mee er ghoaill-rish my raaidyn, as t'ou uss er my chlashtyn: O ynsee dou dty lattyssyn.	I have acknowledged my ways, and thou heardest me: O teach me thy statutes.
27	Cur orrym toiggal raad dt'annaghyn:. as myr shen nee'm taggloo jeh dt'obbraghyn yindyssagh.	Make me to understand the way of thy commandments: and so shall I talk of thy wondrous works.
28	Ta m'annym's lheïe ersooyl son eer trimshey: jean m'y gherjaghey cordail rish dty ghoo.	My soul melteth away for very heaviness: comfort thou me according unto thy word.
29	Scugh foddey voym yn raad dy vreagyn: as cur orrym mooar y yannoo jeh dty leigh.	Take from me the way of lying: and cause thou me to make much of thy law.
30	Ta mee er reih raad ny firrinys: as dty vriwnyssyn ta mee er hoiaghey kiongoyrt rhym.	I have chosen the way of truth: and thy judgements have I laid before me.
31	Ta mee er lhiantyn gys dty recortyssyn: O Hiarn, ny jean mish y choyrt gys nearey.	I have stuck unto thy testimonies: O Lord, confound me not.
32	Neem's roie ayns raad dty annaghyn: tra t'ou uss er hoiaghey my chree ec reamys.	I will run the way of thy commandments: when thou hast set my heart at liberty.
He
33	Ynsee dou, O Hiarn, raad dty lattyssyn: as freill-ym eh gys y jerrey.	Teach me, O Lord, the way of thy statutes: and I shall keep it unto the end.
34	Cur dou tushtey, as freill-ym dty leigh: freill-ym eh dy jarroo lesh ooilley my chree.	Give me understanding, and I shall keep thy law: yea, I shall keep it with my whole heart.
35	Cur orrym dy immeeaght ayns cassan dt'annaghyn: son shen y raad ta my yeearree,	Make me to go in the path of thy commandments: for therein is my desire.
36	Croym my chree gys dty recortyssyn: as cha nee gys saynt.	Incline my heart unto thy testimonies: and not to covetousness.
37	O chyndaa ersooyl my hooillyn, nagh der ad geill da fardail: as jean mish y vioghey ayns dty raad.	O turn away mine eyes, lest they behold vanity: and quicken thou me in thy way.
38	O niartee dty ghoo ayns dty harvaant: dy voddyms aggle y ghoaill royd.	O stablish thy word in thy servant: that I may fear thee.
39	Gow ersooyl yn kerraghey ta mie goaill aggle roish: son ta dty vriwnyssyn mie.	Take away the rebuke that I am afraid of: for thy judgements are good.
40	Cur-my-ner, ta my haitnys ayns dt'annaghyn: O jean mish y vioghey ayns dty chairys.	Behold, my delight is in thy commandments: O quicken me in thy righteousness.
Vau
41	Lhig da dty vyghin ghraihagh cheet myrgeddin hyms, O Hiarn: dy jarroo dty haualtys, cordail rish dty ghoo.	Let thy loving mercy come also unto me, O Lord: even thy salvation, according to thy word.
42	Shen myr ver ym ansoor da my noidyn: son ta my hreishteil ayns dty ghoo.	So shall I make answer unto my blasphemers: for my trust is in thy word.
43	O ny gow yn goo dy ynrickys dy bollagh ass my veeal: son ta my hreishteil ayns dty vriwnyssyn.	O take not the word of thy truth utterly out of my mouth: for my hope is in thy judgements.
44	Myr shen freill-ym dy kinjagh dty leigh: dy feer, son dy bragh as dy bragh.	So shall I always keep thy law: yea, for ever and ever.
45	As nee'm gimmeeaght ec my reamys: son ta mee shirrey dt'annaghyn.	And I will walk at liberty: for I seek thy commandments.
46	Loayr-yms jeh dty recortyssyn myrgeddin, dy jarroo fenish reeaghyn: as cha jean-ym nearey 'ghoaill.	I will speak of thy testimonies also, even before kings: and I will not be ashamed.
47	As bee my haitnys ayns dt'annaghyn: ta mee er ve graihagh orroo.	And my delight shall be in thy commandments: which I have loved.
48	My laueyn neesht troggym seose gys dt'annaghyn, ta mee er ve graihagh orroo: as bee my smooinaghtyn dowin er dty lattyssyn.	My hands also will I lift up unto thy commandments, which I have loved: and my study shall be in thy statutes.
Zain
49	O smooinee er dty harvaant cordail rish dty ghoo: ayn t'ou er choyrt orrym dy chur my hreishteil	O think upon thy servant, as concerning thy word: wherein thou hast caused me to put my trust.
50	Shoh ta dy my gherjaghey ayns my heaghyn: son ta dty ghoo er my vioghey.	The same is my comfort in my trouble: for thy word hath quickened me.
51	Ta mee ee ny mooaralee feer vooar ayns faghid: ny-yeih cha vel mee er skyrraghtyn veih dty leigh.	The proud have had me exceedingly in derision: yet have I not shrinked from thy law.
52	Son chooinee mee er dty vriwnyssyn er dyn chenn earish, O Hiarn: as va mee er my gherjaghey.	For I remembered thine everlasting judgements, O Lord: and received comfort.
53	Ta mee fo aggle atchimagh: er coontey ny mee-chrauee ta treigeil dty leigh.	I am horribly afraid: for the ungodly that forsake thy law.
54	Ta dty lattyssyn er ve my arraneyn: ayns thie my yoarreeaght.	Thy statutes have been my songs: in the house of my pilgrimage.
55	Ta mee er smooinaghtyn er dt'Ennym's, O Hiarn, ayns earish ny hoie: as er vreayll dty leigh.	I have thought upon thy Name, O Lord, in the night-season: and have kept thy law.
56	Shoh va my gherjaghey: er-y-fa dy dreill mee dty annaghyn.	This I had: because I kept thy commandments.
Cheth
57	Uss my eiraght, O Hiarn: ta mee er yialdyn dy reayll dty leigh.	Thou art my portion, O Lord: I have promised to keep thy law.
58	Ren mee my accan imlee ayns dt'enish lesh ooilley my chree; O bee myghinagh dou cordail rish dty ghoo.	I made my humble petition in thy presence with my whole heart: O be merciful unto me, according to thy word.
59	Deïe mee er my raaidyn hene gys cooinaghtyn: as hyndaa mee my chassyn gys dty recortyssyn.	I called mine own ways to remembrance: and turned my feet unto thy testimonies.
60	Ren mee siyr, as cha lhig mee shaghey yn traa: dy reayll dty annaghyn.	I made haste, and prolonged not the time: to keep thy holy commandments.
61	Ta sheshaghtyn ny mee-chrauee er my roostey: agh cha vel mish er yarrood dty leigh.	The snares of the ungodly have compassed me about: but I have not forgotten thy law.
62	Ec y vean-oie nee'm girree dy chur booise dhyt: er coontey dty vriwnyssyn cairagh.	At midnight I will rise to give thanks unto thee: because of thy righteous judgements.
63	Ta mee my heshey dauesyn ooilley ta goaill aggle royd: as ta freayll dty annaghyn.	I am a companion of all them that fear thee: and keep thy commandments.
64	Ta'n seihll, O Hiarn, lane jeh dty vyghin: O ynsee dou dty lattyssyn.	The earth, O Lord, is full of thy mercy: O teach me thy statutes.
Teth
65	O Hiarn, t'ou er ghellal dy graysoil rish dty harvaant: cordail rish dty ghoo.	O Lord, thou hast dealt graciously with thy servant: according unto thy word.
66	O ynsee dou toiggal as tushtey firrinagh: son ta mee er chredjal dty annaghyn.	O learn me true understanding and knowledge: for I have believed thy commandments.
67	Roish my row mee seaghnit, hie mee er-shaghryn: agh nish ta mee er vreayll dty ghoo.	Before I was troubled, I went wrong: but now have I kept thy word.
68	T'ou uss mie as graysoil: O ynsee dou dty lattyssyn.	Thou art good and gracious: O teach me thy statutes.
69	Ta ny mooaralee er droggal breg orrym: agh freill-yms dt'annaghyn lesh ooilley my chree.	The proud have imagined a lie against me: but I will keep thy commandments with my whole heart.
70	Ta'n cree oc cha roauyr as saill: agh ta my haitnys er ve ayns dty leigh.	Their heart is as fat as brawn: but my delight hath been in thy law.
71	S'mie te er my hon dy row mee ayns seaghyn: dy voddym gynsaghey dty lattyssyn.	It is good for me that I have been in trouble: that I may learn thy statutes.
72	Ta leigh dty veeal ny smoo dy voggey dou: na millaghyn dy airh as argid.	The law of thy mouth is dearer unto me: than thousands of gold and silver.
Jod
73	Ta dty laueyn er my chroo as er my chummey: O cur dou tushtey, dy voddym gynsaghey dt'annaghyn.	Thy hands have made me and fashioned me: O give me understanding, that I may learn thy commandments.
74	Bee adsyn ta goaill aggle royd, gennal tra hee ad mee: er-yn-oyr dy vel mee er choyrt my hreishteil ayns dty ghoo.	They that fear thee will be glad when they see me: because I have put my trust in thy word.
75	Ta fys aym, O Hiarn, dy vel dty vriwnyssyn cairagh: as dy vel oo ayns eer ynrickys er choyrt seaghyn orrym.	I know, O Lord, that thy judgements are right: and that thou of very faithfulness hast caused me to be troubled.
76	O lhig da dty chenjallys vyghinagh ve my gherjagh: cordail rish dty ghoo da dty harvaant.	O let thy merciful kindness be my comfort: according to thy word unto thy servant.
77	O lhig da dty vyghinyn graihagh cheet hyms, dy voddym ve bio: son ta my voggey ayns dty leigh.	O let thy loving mercies come unto me, that I may live: for thy law is my delight.
78	Lhig da ny mooaralee ve coodit lesh nearey, son t'ad dy olkyssagh goll mygeayrt dy my stroie: agh neem's smooinaghtyn dy dowin er dt'annaghyn.	Let the proud be confounded, for they go wickedly about to destroy me: but I will be occupied in thy commandments.
79	Lhig dauesyn ta goaill aggle royd, as t'er hoiggal dty recortyssyn: v'er nyn jyndaa hyms.	Let such as fear thee, and have known thy testimonies: be turned unto thee.
80	O lhig da my chree v'er ny hickyraghey ayns dty lattyssyn: nagh bee nearey orrym.	O let my heart be sound in thy statutes: that I be not ashamed.
Caph
81	Ta m'annym er ghoaill foddeeaght son dty haualtys: as ta my hreishteil mie er graih dty ghoo.	My soul hath longed for thy salvation: and I have a good hope because of thy word.
82	Ta my hooillyn farkiaght dy jeean son dty ghoo: gra, O cuin nee oo mish y gherjaghey?	Mine eyes long sore for thy word: saying, O when wilt thou comfort me?
83	Son ta mee shymlit myr crackan ayns y jaagh: ny-yeih cha vel mee jarrood dty lattyssyn.	For I am become like a bottle in the smoke: yet do I not forget thy statutes.
84	Cre whilleen ta laghyn dty harvaant: cuin nee oo cooilleen y ghoaill orroosyn ta jannoo tranlaase orrym.	How many are the days of thy servant: when wilt thou be avenged of them that persecute me?
85	Ta'n sleih moyrnagh er chleiy ooigyn er my hon: nagh vel cordail rish dty leigh.	The proud have digged pits for me: which are not after thy law.
86	Ta ooilley dt'annaghyn firrinagh: t'ad jannoo tranlaase orrym dy aggairagh; O bee uss my niart.	All thy commandments are true: they persecute me falsely; O be thou my help
87	V'ad faggys er n'yannoo kione orrym er y thalloo: agh cha hreig mee dt'annaghyn.	They had almost made an end of me upon earth: but I forsook not thy commandments.
88	O jean mish y vioghey lurg dty-chenjallys ghraihagh: as myr shen freill-ym recortyssyn dty veeal.	O quicken me after thy loving-kindness: and so shall I keep the testimonies of thy mouth.
Lamed
89	O Hiarn, ta dty ghoo: farraghtyn son dy bragh ayns niau.	O Lord, thy word: endureth for ever in heaven.
90	Ta dt'irriney myrgeddin farraghtyn veih sheeloghe gys sheeloghe: t'ou er hoiaghey undin ny hooirey, as te er-mayrn.	Thy truth also remaineth from one generation to another: thou hast laid the foundation of the earth, and it abideth.
91	T'ad tannaghtyn gys y laa t'ayn jiu cordail rish dty oardagh: son ta dy chooilley nhee dy dty hirveish.	They continue this day according to thine ordinance: for all things serve thee.
92	Er-be dy row my voggey ayns dty leigh: veign er herraghtyn ayns my heaghyn.	If my delight had not been in thy law: I should have perished in my trouble.
93	Cha jarrood-ym dt'annaghyn dy bragh: son lioroosyn t'ou er my vioghey.	I will never forget thy commandments: for with them thou hast quickened me.
94	Ta mee lhiats; O saue mee: son ta mee er hirrey lurg dt'annaghyn.	I am thine, O save me: for I have sought thy commandments.
95	Ren ny mee-chrauee lhie ayns farkiaght er my hon dy my stroie: agh smooinee-yms er dty recortyssyn.	The ungodly laid wait for me to destroy me: but I will consider thy testimonies.
96	Ta mee fakin dy vel jerrey er dy chooilley nhee: agh ta dty annaghyn erskyn-towse lhean.	I see that all things come to an end: but thy commandment is exceeding broad.
Mem
97	Hiarn, cre'n ghraih t'ayms er dty leigh: fey-ny-laa ta mee smooinaghtyn er dy dowin.	Lord, what love have I unto thy law: all the day long is my study in it.
98	T'ou uss trooid dt'annaghyn er my yannoo ny s'creeney na my noidyn: son t'ad dy kinjagh mârym.	Thou through thy commandments hast made me wiser than mine enemies: for they are ever with me.
99	Ta ny smoo dy hushtey aym na t'ec my ir-ynsee: son ayns dty recortyssyn ta mee baarail my smooinaghtyn.	I have more understanding than my teachers: for thy testimonies are my study.
100	Ta mee ny s'creeney na'n chenndeeaght: er-yn-oyr dy vel mee freayll dt'annaghyn.	I am wiser than the aged: because I keep thy commandments.
101	Ta mee er chummal my chassyn veih dy chooilley ghrogh raad: dy voddin freayll dty ghoo.	I have refrained my feet from every evil way: that I may keep thy word.
102	Cha vel mee er skyrraghtyn veih dty vriwnyssyn: son t'ou dy my ynsaghey	I have not shrunk from thy judgements: for thou teachest me.
103	O cre cha millish ta dty ghoan gys my vlass: dy jarroo, ny s'miljey na mill da my veeal!	O how sweet are thy words unto my throat: yea, sweeter than honey unto my mouth.
104	Trooid dt'annaghyn ta mee geddyn tushtey: shen-y-fa ta dwoaie aym er dy chooilley ghrogh raad.	Through thy commandments I get understanding: therefore I hate all evil ways.
Nun
105	Ta dty ghoo londeyr da my chassyn: as soilshey da my chesmadyn.	Thy word is a lantern unto my feet: and a light unto my paths.
106	Ta mee er vreearrey, as ta mee dy shickyr kiarit: dy reayll dty vriwnyssyn.	I have sworn, and am stedfastly purposed: to keep thy righteous judgements.
107	Ta mee seaghnit erskyn towse: jean mish y vioghey, O Hiarn, cordail rish dty ghoo.	I am troubled above measure: quicken me, O Lord, according to thy word.
108	Lhig da ourallyn arryltagh my veeal uss y wooiys, O Hiarn: as ynsee dou dty vriwnyssyn.	Let the free-will offerings of my mouth please thee, O Lord: and teach me thy judgements.
109	Ta m'annym dy kinjagh ayns my laue: ny-yeih cha vel mee jarrood dty leigh.	My soul is alway in my hand: yet do I not forget thy law.
110	Ta ny mee-chrauee er hoiaghey ribbey er my hon: agh ny-yeih cha jagh mee er-shaghryn veih dty annaghyn.	The ungodly have laid a snare for me: but yet I swerved not from thy commandments.
111	Dty recortyssyn ta mee er hirrey myr m'eiraght son dy bragh; as cre'n-fa? t'ad eer boggey my chree.	Thy testimonies have I claimed as mine heritage for ever: and why? they are the very joy of my heart.
112	Ta mee er chroymmey my chree dy chooilleeney dty lattyssyn dy kinjagh: dy jarroo gys y jerrey.	I have applied my heart to fulfil thy statutes alway: even unto the end.
Samech
113	Ta dwoaie aym orroosyn ta smooinaghtyn er yn olk: agh shynney lhiam dty leigh.	I hate them that imagine evil things: but thy law do I love.
114	T'ou uss my endeilagh as my choadey: as ta my hreishteil ayns dty ghoo.	Thou art my defence and shield: and my trust is in thy word.
115	Ass my enish, shiuish ghrogh-yantee: freill-yms annaghyn my Yee.	Away from me, ye wicked: I will keep the commandments of my God.
116	O niartee mee cordail rish dty ghoo, dy voddym 've beayn as ny lhig dou tuittym giare jeh my hreishteil.	O stablish me according to thy word, that I may live: and let me not be disappointed of my hope.
117	Jean uss mish y chummal seose, as bee'm sauchey: bee my haitnys dy jarroo ayns dty lattyssyn.	Hold thou me up, and I shall be safe: yea, my delight shall be ever in thy statutes.
118	T'ou uss er choyrt fo-chosh adsyn ooilley ta cur cooyl rish dty lattyssyn: son cha vel ad smooinaghtyn agh er molteyraght.	Thou hast trodden down all them that depart from thy statutes: for they imagine but deceit.
119	T'ou sheebey ersooyl ooilley mee-chrauee yn thallooin myr kesh: shen-y-fa shynney lhiam dty recortyssyn.	Thou puttest away all the ungodly of the earth like dross: therefore I love thy testimonies.
120	Ta my eill er-creau son aggle jeeds: as ta mee fo atchim dty vriwnyssyn.	My flesh trembleth for fear of thee: and I am afraid of thy judgements.
Ain
121	Ta mee dellal ayns y chooish ta lowal as jeeragh: O ny faag mee fo pooar my hranlaasee.	I deal with the thing that is lawful and right: O give me not over unto mine oppressors.
122	Cur er dty harvaant dy ghoaill taitnys ayns shen ny ta mie: nagh jean ny mooaralee veg yn aggair dou.	Make thou thy servant to delight in that which is good: that the proud do me no wrong.
123	Ta my hoilshey er vailleil lesh jeeagh yn son dty lhaynt: as son goo dty chairys.	Mine eyes are wasted away with looking for thy health: and for the word of thy righteousness.
124	O dell rish dty harvaant cordail rish dty vyghin ghraihagh: as ynsee dou dty lattyssyn.	O deal with thy servant according unto thy loving mercy: and teach me thy statutes.
125	Ta mish dty harvaant: O cur dou tushtey: dy voddym toiggal dty lattyssyn.	I am thy servant, O grant me understanding: that I may know thy testimonies.
126	Te traa dhyt, Hiarn, dy hroggal dty laue: son t'ad er choyrt naardey dty leigh.	It is time for thee, Lord, to lay to thine hand: for they have destroyed thy law.
127	Son shynney lhiam dty annaghyn: erskyn airh as claghyn costal.	For I love thy commandments: above gold and precious stone.
128	Shen-y-fa ta mee cummal jeeragh ayns ooilley dty annaghyn: agh son raaidyn cammey ta slane dwoaie aym orroo ooilley.	Therefore hold I straight all thy commandments: and all false ways I utterly abhor.
Pe
129	Ta dty recortyssyn yindyssagh: shen-y-fa ta m'annym dy reayll ad.	Thy testimonies are wonderful: therefore doth my soul keep them.
130	Tra ta dty ghoo goll magh: te coyrt soilshey as creenaght da'n vooinjer ôney.	When thy word goeth forth: it giveth light and understanding unto the simple.
131	Doshil mee my veeal, as ghow mee ennal: son ta my haitnys ayns dt'annaghyn.	I opened my mouth, and drew in my breath: for my delight was in thy commandments.
132	O jeeagh orrym, as bee myghinagh dou: myr boallagh oo jannoo roosyn ta graihagh er dt'Ennym.	O look thou upon me, and be merciful unto me: as thou usest to do unto those that love thy Name.
133	Jean my chesmadyn y leeideil ayns dty ghoo: as myr shen cha vow mee-chrauee aght erbee barriaght orrym.	Order my steps in thy word: and so shall no wickedness have dominion over me.
134	O livrey mee veih tranlaase drogh gheiney: as myr shen freill-ym dt'annaghyn.	O deliver me from the wrongful dealings of men: and so shall I keep thy commandments.
135	Lhig da dt'eddin soilshean er dty harvaant: as ynsee dou dty lattyssyn.	Shew the light of thy countenance upon thy servant: and teach me thy statutes.
136	Ta my hooillyn shilley lesh jeir: er-yn-oyr nagh vel deiney freayll dty leigh.	Mine eyes gush out with water: because men keep not thy law.
Tsaddi
137	T'ou uss cairagh, O Hiarn: as ynrick ta dty vriwnyssyn.	Righteous art thou, O Lord: and true is thy judgement.
138	Ny recortyssyn t'ou uss er n'oardaghey: t'ad erskyn-towse cairagh as firrinagh.	The testimonies that thou hast commanded: are exceeding righteous and true.
139	Ta my ghraih's jeean er my choyrt eer naardey: son dy vel my noidyn er yarrood dty ghoan.	My zeal hath even consumed me: because mine enemies have forgotten thy words.
140	Ta dty ghoo's er ny phrowal gys y chooid sodjey: as ta graih ec dty harvaant er.	Thy word is tried to the uttermost: and thy servant loveth it.
141	Ta mee fardalagh, as beg er ny hoiaghey jee'm: ny-yeih cha vel mee jarrood dt'annaghyn.	I am small, and of no reputation: yet do I not forget thy commandments.
142	Ta'n chairys ayds cairys dy bragh farraghtyn: as dty leigh yn irriney.	Thy righteousness is an everlasting righteousness: and thy law is the truth.
143	Ta seaghyn as trimshey er ghoaill greme orrym: ny-yeih ta my haitnys ayns dt'annaghyn.	Trouble and heaviness have taken hold upon me: yet is my delight in thy commandments.
144	Ta cairys dty recortyssyn dy bragh farraghtyn: O giall dou tushtey, as bee'm bio.	The righteousness of thy testimonies is everlasting: O grant me understanding, and I shall live.
Koph
145	Ta mee geamagh lesh ooilley my chree: eaisht rhym, O Hiarn, freill-ym dty lattyssyn.	I call with my whole heart: hear me, O Lord, I will keep thy statutes.
146	Hoods, dy feer ta mee geamagh: cooin lhiam, as freill-ym dty recortyssyn.	Yea, even unto thee do I call: help me, and I shall keep thy testimonies.
147	Ec brishey'n laa ta mee geamagh hoods: son ayns dty ghoo ta my hreishteil.	Early in the morning do I cry unto thee: for in thy word is my trust.
148	Ta my hooillyn dooisht roish arrey ny hoie: dy voddym my hraa 'vaarail ayns dty ghoan.	Mine eyes prevent the night-watches: that I might be occupied in thy words.
149	Clasht rish my choraa, O Hiarn, cordail rish dty chenjallys-ghraihagh: cur bree ayn-ym myr boallagh oo.	Hear my voice, O Lord, according unto thy loving-kindness: quicken me, according as thou art wont.
150	T'ad tayrn er-gerrey ta dy goanlyssagh jannoo tranlaase orrym: as t'ad foddey veih dty leigh.	They draw nigh that of malice persecute me: and are far from thy law.
151	Bee uss er-gerrey ec laue, O Hiarn: son ta ooilley dty annaghyn firrinagh.	Be thou nigh at hand, O Lord: for all thy commandments are true.
152	Mychione dty annaghyn, ta fys aym foddey er-dy-henney: dy vel oo er hoiaghey ad er undin shickyr son dy bragh.	As concerning thy testimonies, I have known long since: that thou hast grounded them for ever.
Resh
153	O smooinee er my arkys, as livrey mee: son cha vel mee jarrood dty leigh.	O consider mine adversity, and deliver me: for I do not forget thy law.
154	Gow my chooish ayns laue as livrey mee: jean mee y vioghey cordail rish dty ghoo.	Avenge thou my cause, and deliver me: quicken me, according to thy word.
155	Ta slaynt foddey voish ny mee-chrauee: son cha vel ad cur geill da dty lattyssyn.	Health is far from the ungodly: for they regard not thy statutes.
156	S'mooar ta dty vyghin, O Hiarn: jean mee y vioghey myr boallagh oo.	Great is thy mercy, O Lord: quicken me, as thou art wont.
157	Shimmey t'adsyn ta dy my voirey as jannoo tranlaase orrym: ny-yeih cha vel mish goll dy lhiattee voish dty recortyssyn.	Many there are that trouble me, and persecute me: yet do I not swerve from thy testimonies.
158	Te trimshey dou dy akin ny drogh-yantee: son nagh vel ad freayll dty leigh.	It grieveth me when I see the transgressors: because they keep not thy law.
159	Smooinee, O Hiarn, kys shynney lhiam dt'annaghyn: O jean mish y vioghey cordail rish dty chenjallys-ghraihagh.	Consider, O Lord, how I love thy commandments: O quicken me, according to thy loving-kindness.
160	Ta dty ghoo's firrinagh er-dy-rieau: ta ooilley briwnyssyn dty chairys farraghtyn son dy bragh.	Thy word is true from everlasting: all the judgements of thy righteousness endure for evermore.
Schin
161	Ta princeyn er n'yannoo tranlaase orrym gyn oyr: agh ta my chree shassoo ayns aggle jeh dty ghoo.	Princes have persecuted me without a cause: but my heart standeth in awe of thy word.
162	Ta wheesh dy voggey aym jeh dty ghoo: as t'ec fer ta cosney mooarane spooilley.	I am as glad of thy word: as one that findeth great spoils.
163	Er son breagyn, ta feoh as dwoaie aym orroo: agh shynney lhiam dty leigh.	As for lies, I hate and abhor them: but thy law do I love.
164	Shiaght keayrtyn 'sy laa ta mee dy dty voylley: er graih dty vriwnyssyn cairagh.	Seven times a day do I praise thee: because of thy righteous judgements.
165	S'mooar ta'n shee t'ocsyn ta graihagh er dty leigh: as cha der nhee erbee orroo eh y hreigeil.	Great is the peace that they have who love thy law: and they have none occasion of falling.
166	Hiarn, ta mee er yeeaghyn son dty haualtys slayntoil: as er n'yannoo lurg dt'annaghyn.	Lord, I have looked for thy saving health: and done after thy commandments.
167	Ta m'annym er vreayll dty recortyssyn: as er choyrt graih erskyn towse daue.	My soul hath kept thy testimonies: and loved them exceedingly.
168	Ta mee er vreayll dt'annaghyn as dty recortyssyn: son ta ooilley my raaidyn kiongoyrt rhyt.	I have kept thy commandments and testimonies: for all my ways are before thee.
Tau
169	Lhig da my accan cheet kiongoyrt rhyt, O Hiarn: cur dou tushtey cordail rish dty ghoo.	Let my complaint come before thee, O Lord: give me understanding, according to thy word.
170	Lhig da my aghin cheet gys dt'enish: livrey mee cordail rish dty ghoo.	Let my supplication come before thee: deliver me, according to thy word.
171	Nee my veillyn fockley magh dty voylley: tra t'ou er m'ynsaghey ayns dty lattyssyn.	My lips shall speak of thy praise: when thou hast taught me thy statutes.
172	Dy jarroo nee my hengey arrane y ghoaill jeh dty ghoo: son ta ooilley dt'annaghyn cairagh.	Yea, my tongue shall sing of thy word: for all thy commandments are righteous.
173	Lhig da dty laue cooney lhiam: son ta mee er ghoaill dty annaghyn myr reih.	Let thine hand help me: for I have chosen thy commandments.
174	Ghow mee foddeeaght son dty haualtys slayntoil, O Hiarn: as ayns dty leigh ta my haitnys.	I have longed for thy saving health, O Lord: and in thy law is my delight.
175	O lhig da m'annym ve bio, as nee eh uss y voylley: as nee dty vriwnyssyn cooney lhiam.	O let my soul live, and it shall praise thee: and thy judgements shall help me.
176	Ta mee er n'gholl er-shaghryn myr keyrrey chailjey: O cur lhiat thie dty harvaant; son cha vel mee jarrood dty annaghyn.	I have gone astray like a sheep that is lost: O seek thy servant, for I do not forget thy commandments.

Book

Chapter